Qırımda Rusiyeniñ nezaretinde olğan Aqmescitniñ Merkeziy rayon mahkemesi qırımlı advokat Nazim Şeyhmambetovğa sekiz kün memuriy apis cezasını berdi. Bunı "Qırım birdemligi" cemaat birleşmesi haber etti.
Faallerniñ aytıp bergeni kibi, qırımlı advokatnıñ menfaatlarını imayeciler Safiye Şabanova, Siyar Paniç, Emil Kürbedinov, Rustem Kâmilev, Lilâ Gemeci, uquqçı Elvina Semedlâyeva, cemaat imayecileri Lutfiye Zudiyeva ve Ayder Suleymanov qorçalağan. Davanıñ baqıluvında iştirak etmek içün mahkeme binasına kelgen advokatlar Ayder Azamatov ve Emine Avamileva Rusiye quvetçileri tarafından yaqalandı.
Qırım.Aqiqat bu davanıñ tafsilâtını ögrenmege tırışa.
Tünevin Rusiye quvetçileri Aqmescitte mahkeme binası yanında advokat Edem Semedlâyevge uquqiy yardım köstergen advokat Nazim Şeyhmambetovnı yaqaladılar.
Rusiyeniñ Ekstremizm ile küreş merkeziniñ hadimleri Ruslan Şambazov ve Konstantin Urazov Aqmescitte advokat Edem Semedlâyevni tuttı. Rusiye uquq qoruyıcıları bu aqta açıq bir malümat bermedi.
Aqmescitte Rusiye uquq qoruyıcıları tarafından tutulğan qırımlı advokat Edem Semedlâyev Rusiye ordusını «itibardan tüşürgeninde» qabaatlandı. Facebook içtimaiy ağınıñ başqa bir qullanıcısı Rusiye Federatsiyasınıñ Ukrainada yapqanlarına dair paylaşuvında Semedlâyevni qayd etken eken.
Edem Semedlâyev Qırımda Rusiye Federatsiyası ordusınıñ Ukrainada yapqanlarını «itibardan tüşürgeni» içün 75 biñ ruble para cezasını aldı.
2021 senesi advokat Edem Semedlâyev Ekstremizm ile küreş merkeziniñ bölük yolbaşçısı Ruslan Şambazovnıñ talabına riayet etmeyip, ses qaydını toqtatmağanı ve ekstremist tatuları barmı-yoqmı teşkermek içün urbasını çıqarmaq talabına razı olmağanı içün Aqmescitteki Rusiye mahkemesi tarafından Rusiye Federatsiyasınıñ Memuriy bozuvlar kodeksiniñ 19.3 maddesine istinaden 12 künge apiske alındı ve 4 biñ ruble para cezasını aldı.
ABD OSCE missiyası Qırımdaki mustaqil advokatlarğa qarşı taqip siyasetini toqtatmağa çağırdı. Semedlâyevniñ apiske alınuvı Büyük Britaniya Ukraina elçihanesi ve Çeh Cumhuriyetiniñ elçihanesi takbih ettiler. Ukraina Tış işler nazirligi Edem Semedlâyevniñ apiske alınğanını «iş aqlarınıñ bozuluvı» ve «basqı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
