Ukrayina prezidenti Volodımır Zelenskıy Mıkolayiv yüksek tasil müessiseleriniñ studentleri ile keçirigen körüşüvde memleketniñ Donbas ve Qırımnıñ işğalden azat etilmesinden soñ Ukrayinanıñ uzun vaqıttır vaqtınca işğal etilgen topraqlarda yaşağan adamlarnı zihniyet ceetinden keri qaytarmağa nasıl planlaştırğanı mevzusında añlayışı olğanını bildirdi. Aynı zamanda devlet başı bunıñ Qırımda yapılmasınıñ Donbastan qolay olacağını qayd etti.Ne içün böyle - Qırım.Aqiqatnıñ materialında oquñız.
Volodımır Zelenskıy qayd etti ki, "donetsk ve Lugansk vilâyetlerindeki vaziyet qırımdan daa mürekkeptir, çünki "2014-teki işğalden soñ Donbasta işğalcilerniñ taarfında cenkleşken speratistlerniñ iştiragi ile muntazam şekilde uruşlarnıñ ketken kontakt hat peyda oldı.
"Qırımda, Donbas da keri qaytuvnı sabırsızlıqnen bekley. Amma pek kıyın olacaq, çünki bu territoriyanıñ büyük qısmı işğal altında edi ve olduqça arbiyleştirildi. Adamlar başta kontakt hatqa soñra ise büyük cenkke ketti", - dep bildirdi o.
Bundan soñ Rusiye haber vastalarından Qırımda yaşağanlarnıñ Ukrayinağa loyalsizligi aqqında yazılar peyda oldı. Misal olaraq, Ukrayina telükesizlik hızmetiniñ sabıq polkovnigi Oleğ Starikovnıñ lafını keniş şekilde darqaattılar. O, Ukrayina ordusı Qırımnı zapt etse o anda millionlarnen partizannıñ qarşılığını körecek, dep aytqan edi.
Zelenskıynıñ sözlerini Qırımnıñ işğal yolbaşçısı Sergey Aksönov da izaatladı. O, "Ukrayina prezidenti Volodımır Zelenskıy Qırım Kıyiv akimiyetiniñ tiklenmesini bekley degende yalan ayta", dep ayttı.
Öz nevbetinde "Qırım platforması" ofisiniñ reberi Mariya Tomak cemiyet arasında şimdi Qırımğa dair Rusiye içün elverişli narrativler faal şekilde darqatılğanını bildirdi.
"Qırım etrafında faal şekilde darqalğan daa bir narrativ bar. Bu, Ukrayinanı desteklegen adamlar yarımadanı terk etkenler. Soñki vaqıtları em halqara matbuatta, em de halqara ortaqlarımıznıñ suallerinde olğanını körip başladım. Ne deyler? qırımdan ukrayinalı insanlarnıñ episi ketti de. Bu yalan, Qırım Ukrayina qıtası ile bağlıdır", - dep bildirdi Tomak.
Ukrayinalı video blogeri Denis Kazanskiy Qırımda Rusiye propagandacılarnıñ laflarını talil etti ve olar Qırımdaki admalar Ukrayinanı beklegenini itiraf etkenlerini ayttı.
"Rusiye propagandacıları işğal etilgen Qırımda adamlarnı keniş şekilde Ukrayinanı desteklegenini ve qaytmasını beklegenini itiraf ettiler. Z-vatanseverleri etrafta Ukrayina tarafdarları pek çoq olğanını itiraf eteler", - dep ayta bloger.
Lugansk vilâyetiniñ sabıq başı Sergiy Ğayday, Rusiye propagandasınen sarhoş olğan Donbas gençleriniñ Ukrayinağa qarşı arbiy ameliyatlarda faal iştiragi aqqında aytıp berdi.
"Bizim mahsus hızmetlerimiz diversion gruppalarnı tuta edi. Olarnıñ terkibinde 14 yaşta işğal altın tüşken genç adamlar bar edi. Olar o qadar aldatılğan ki, şimdi mında kelip bizni öldürmege azırlar", - dep aytı o.
#LiberateCrimea halqara areketiniñ faali, Qırımtatar resurs merkeziniñ eksperti, USQ arbiyi Sergiy Parhomenko "Qırımnı zihniyet ceetinden reintegratsiya etmege Donbastan daa qolay olacağı" aqqında prezidentniñ fikri ile razı olğanını ayttı.
"Yalıñız Ukrayinanı desteklegen vatandaşlarnıñ sayısı çoq olğanında degil, aynı zamanda tamır qırımtatar halqı sayesinde de. Daa cenübiy Ukrayinanıñ işğali vaqtında Rusiyeniñ başı aylandırmağa yetiştirmegen bazı ukrayinler cenkten qaçmaq içün Qırımğa kettiler. Cenüpte körgenleri de işğalcilerge sevim duydırmaz. 2022 senesine qadar pervasız olğan kişilerniñ bile Rusiyege işansı aman-aman yoq ola. Olar Ukrayinaı bekley, işğalcilerniñ yapqanlarını köreler, cenkke seferber etilmek istemeyler", - dep bildire ekspert.
"İnsan aqları platforması" cemaat teşkilâtınıñ icra müdiri, hersonlı uquq qoruyıcı O leksandra Stepanov "2014 senesiniñ işğali ve 2022 senesiniñ işğali farqlanğanını" saya.
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
