Qırımtatar faali İlver Ametovnıñ cinaiy davasındaki qabaatlav hulâsasından nariye silâsınıñ qanunsız satın alınmasınen bağlı qısım çıqarıldı. Bu aqta advokat Aleksey Rostovtsev mahkeme oturışuvından soñ Qırım.Aqiqat mühbirine bildirdi.
Onıñ bildirgenine köre, devlet qabaatlayıcısı yañı qabaatlav hulâsasını bermek içün muracaat etti. İmayeci, yañı hulâsa eki abzats az edi, dep ayttı. Rostovtsevniñ aytqanına köre, prokuratura İlver Ametovnı nariye silâsını qanunsız satın alğanında qabaatlağan qısımnı vesiqadan çıqardı.
Advokatnıñ bildirgenine köre, imaye tarafınıñ yañı qabaatlav hulâsasınen tanış olmağa aqqı bar, şunıñ içün qadı Yelena Bosi avgustnıñ 4-ne qadar teneffüs ilân etti. Advokat Rostovtsev şu künü mahkeme tahqiqatı yekünlene bile ve taraflar munaqaşağa keçer, dep ayta bile.
Rusiye kontrolindeki Sudaq şeer mahkemesi qırımtatar faali İlver Ametovnıñ müzey kollektsiyasından alınğan eşyanen bağlı ballistik ekspertizanı tekrar yaptırmağa qarar bergen edi.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
