Rusiye tarafından işğal etilgen Qırımda bu sene qara qış ayınıñ başından berli qıdırılğan qıznıñ cesedi tapıldı. Bu aqta Rusiye kütleviy haber vastaları ve telegram kanalları bildire.
Bir sıra rusiyeli haber yayınları ve ASTRA teleradiokompaniyası, söz qara qış ayınıñ 4-nde ğayıp olğan 17 yaşındaki Elvina Kravçenko aqqında kete, dep bildire. Birinci bu aqta "LisaAlert" qıdıruv-qurtaruv taqımı haber etti.
Qız Canköy ihtisasiy tehnikumında oquy edi. Qara qış ayınıñ 1-nde 17 yaşını toldurdı. Kütleviy haber vastaları, o, "Dayvinçik" cemiyetinde qomşu köyniñ genç adamınen tanış olğanını yaza. Onıñnen körüşken soñ ğayıp olğanı qayd etildi.
"Rusiye gazeti" haber etkenine köre, qıznıñ cesedi onıñ yañı tanışınıñ köyünden uzaq olmağan tarlada tapılğan. Neşirniñ malümatına köre, cinayette şübheli tutulğan.
"21 yaşındaki bir oğlan oña maşnanen aylanmaqnı teklif etti, bundan soñ gençler arasında qavğa çıqtı. Uquq qoruyıcılar, genç oğlan qıznı boğıp öldürdi, soñra ise cesedinden qurtulmağa tırıştı, dep tüşüne", — dep haber ete gazeta menbasına atıf etip
ASTRA telegram kanalı qayd etti ki, qara qış ayınıñ 4-nde Elvina tuvğanlarına qomşu köyde babasını ziyaret etmege ketkenini bildirdi (babası qorantası ile yaşamay), amma aqiqatta oğlannen körüşüvge ketti. Anda, elâk olğan qıznıñ cesedini yaqmağa tırışılğanı qayd etildi. Kanal, Marino köyüniñ sakinleri ve elâk olğan qadınnıñ tuvğanlarına esaslanıp, studentniñ öldürüvinde şübheli sayılğan rusiyeli parağa askerlik yapqan Dmitriy Popov tutuldı, dep bildire.
Telegram kanalınıñ malümatına köre, cesetniñ teşkerüvi bazarertesi künü olacaq, cenaze ise salı künü ötkerilecek.
