İtaliyanıñ Brescia vilâyetinde martnıñ 13-ünde ukrain qadın elâk oldı, onıñ koronavirus hastalığı bar edi. Bunı Ukraina TİN bildire, dep haber ete Azatlıq Radiosı.
TİN-niñ hadimi, qadın bir qaç kün evel yürek hastalığınıñ kerginleşmesi sebebinden hastahanege qoyulğanını haber etti.
Martnıñ 12-sinde oña koronavirus hastalığı diagnozını qoydılar.
Şimdilik Ukrainada üç tasdıqlanğan koronavirus hastalığı adisesi bar: birisi - Jıtomir vilâyetinde, ekisi - Çernivtsi vilâyetinde.
Martnıñ 12-sinde Ukrainada koronavirus epidemiyasınıñ ögüni almaq içün üç aftalıq karantin başlandı.
Ukrainada koronavirustan ilk ölüm qayd etildi. Bu - Jıtomir vilâyetiniñ 71 yaşındaki sakini edi.
Martnıñ 12-sinde Dünya sağlıq teşkilâtı koronavirus pandemiyasını ilân etti.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
