Kyiv vaqtınen saat 22 İsrailde Tel Aviv Sergi Merkezinde “Evrovision-2019” yır yarışınıñ birinci yarıfinalı başlandı, dep bildire Azatlıq Radiosı.
Mayısnıñ 14-ünde aqşam 17 iştirakçi sanada çıqış yapacaq, olardan 10-u finalğa keçecek. Olar seyircilerniñ reylerinen ve milliy jüriniñ baalarınen belgilenecek.
Böylece, bugün seyirciler Kipr, Montenegro, Finlândiya, Poloniya, Sloveniya, Çehiya, Macaristan, Belarus, Sırbıstan, Belgiya, Gürcistan, Avstraliya, İslandiya, Estoniya, Portugaliya, Yunanistan ve San-Marino vekilleriniñ çıqışlarını körecek.
“Evrovision-2019”nıñ ekinci yarıfinalı mayısnıñ 16-sında, finalı ise mayıs 18-inde olacaq. Yır konkursınıñ açılışı bazar künü yapıdı.
Ukraina bu yıl «Eurovision-2019» yır yarışında iştirak etmey.
Fevralniñ 23-nde «Eurovision-2019» ukrain milliy saylavında yırcı Maruv ğalebe qazandı. Maruv Rusiyede çıqışta bulunğanını aytqan edi. Daa soñra MARUV «Eurovisionğa» barmaycağı aqqında belli oldı. O, Ukraina milliy devlet teleradiokompaniyası ile añlaşıp olamadı.
Daa soñra Freedom-jazz, Kazka ve Brunettes Shoot Blondes taqımları yarışta iştirak etmekten vazgeçti.
