Ukraina «Eurovision-2019» yır yarışında iştirak etmeycek. Bu aqta Ukraina milliy devlet teleradiokompaniyasınıñ idare reisi Zurab Alasaniya Facebook saifesinde bildirdi.
«Bu vaziyette, Devlet yayınları qanunına esaslanıp, ve milliy saylavnıñ aşırı siyasetleştirüv vaziyetinde, Devlet teleradiokompaniyası «Eurovision-2019» halqara yır yarışında iştirak etmekten vazgeçmege qarar aldı», – dep yazdı Alasaniya.
Fevralniñ 23-nde «Eurovision-2019» ukrain milliy saylavında yırcı Maruv ğalebe qazandı. Maruv Rusiyede çıqışta bulunğanını aytqan edi. Daa soñra MARUV «Eurovisionğa» barmaycağı aqqında belli oldı. O, Ukraina milliy devlet teleradiokompaniyası ile añlaşıp olamadı.
Yırcı MARUV «Eurovisionda» iştirak etmekten vazgeçkenini izaatlap, «yarıştaki iştirakini siyasetçilerimizniñ aktsiyalarına çevirmeyip», şiarlarnen çıqışta bulunmağa azır olmağanını bildirdi. Bundan evel yırcı onı yır yarışından vazgeçtirmek içün basqı yapalar, dep ayttı.
Daa soñra Freedom-jazz, Kazka ve Brunettes Shoot Blondes taqımları yarışta iştirak etmekten vazgeçti.
