İranda uçaq qazasında elâk olğan ukrainlerniñ cesetlerini Kyivge yanvarniñ 19-ında ketirecekler, dep bildirdi «Ukraina halqara ava yolları» ava şirketiniñ matbuat hızmeti.
"İran İslâm Cumhuriyetinde «Ukraina halqara ava yolları» ava şirketi uçağınıñ qazasında elâk olğanlarnıñ añma merasimi "Borispol" halqara ava limanınıñ B terminalında keçirilecek. Er kes qoşula bile. Toplaşuv B Terminalı kirişi yanında saat 12:00. Elâk olğanlarnen saat 13:00 - 19:00 vedalaşmaq mümkün", - haber ete Azatlıq Radiosı.
Ukraina prezidentiniñ Ofisi, qurbanlarnıñ añma merasimi yanvar 19-ında saat 11:30 başlanacaq, dep haber etti.
Daa evel Ukraina İçki İşler Nazirligi, İranda uçaq qazasında elâk olğan ukrainlerniñ cesedleriniñ identifikatsiyası yekünlendi, dep bildirdi.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
