İşğal etilgen Qırımda Osman Muratovğa qarşı «çaqmamazlıq davası» (Rusiye Ceza kodeksiniñ «Cinayet aqqında haber etmeme» 205.6 maddesi) boyunca mahkeme oturışuvında qabaatlav tarafı qırımlınıñ qabaatını isbatlamaq içün 2017 senesi satın alınğan cep telefonından 2016 senesi olğan yazışuvnı kösterdi. Qabaatlanğan kişi yazışmağanını bildirdi, dep haber ete Qırım.Aqiqat mühbiri.
«Bu yazışuvnen bağlı bir sıra sual sebebinden mütehassısnı tekrar sorğuğa çekmege rica ettik. Qadı imayeniñ muracaatı esasında dava malümatına müvekkilimniñ «AliEkspress» saytındaki şahsiy saifesinden çıqaruvnı qoştı, anda cep telefonınıñ 2017 senesi satın alınğanı yazıla. Qabaatlav tarafı bu cep telefonını 2016 senesiniñ yazışuvınen beraber delil olaraq kösterdi. Bu nasıl olur mütehassıs añlatmalı», – dep tarif etti Muratovnıñ advokatı Lilâ Gemeci.
Onıñ bildirgenine köre, mahkeme FSB hadimi Aleksandr Kompaneytsev tarafından keçirilgen qabaatlanğannıñ sorğu ses qaydınıñ bir qısmını diñledi. Berilgen disklerden birini diñlemege çare olmadı – «açılmadı».
Gemeci Muratovğa qarşı davanı müddeti bitkeninden toqtatmağa muracaat etti. Amma qadı Olga Kuznetsova onı qanaatlendirmedi.
Keçken sene noyabr ayında işğal etilgen Qırımda Rusiye FSBsine çaqmamazlıq boyunca ilk dava açıldı.
Kreml kontrolindeki Aqmescitniñ Kiyev rayon mahkemesi Qırımda Rusiye Ceza kodeksiniñ 205.6 maddesine istinaden açılğan birinci çaqmamazlıq davasını baqmağa başladı. FSB tahqiqatınıñ malümatına köre, qabaatlanğan kişi soyu Suriyege İGİL tarafında cenkleşmege ketkenini uquq qoruyıcılarğa bildirmedi.
Qırımda bu adise «Yarovaya qanunı» çerçivesinde qabul etilgen deñişmelerden soñ ilk olacaqtır. Çaqmama maddesine köre 100 biñ rublege qadar para cezasını almaq ya da eki yılğa qadar azatlıqtan marum qalmaq mümkün.
