İmam Raif Fevziyevniñ davası boyunca mahkemeden evel tahqiqat yekünlengen, materiallar prokuraturağa berilgen. Bunı "Qırım birdemligi"ne ömür arqaadşı Liana Fevziyeva haber etti.
Onıñ aytqanına köre, şimdi Fevziyev Aqmescit SİZO-sında "elverişsiz şaraitte" tutula eken, bir qaç künden soñ ise Rostov-na-Donuğa etap etilecek eken.
Liana Fevziyeva qayd etti ki, aqayı SİZO-da türlü hastalıqlardan aytınğan - aşqazan, yürek, qara ciger. Bundan ğayrı, o, yüksek sıcağınen bellisiz yuqunçqa oğrağan.
Raif Fevziyev dımlı 20 kişilik olğan kamerada daa 22 tevqifli ile berabet tutula. Kamerada suvuq, sanitariyasızlıq, yüksek dımlılıq, pencereler tar, daa furun böcekleri, sıçanlar bar eken. Yüksek dımlılıq seviyesi içün pek çoq adam hastalana.
Keçken afta Rusiye FSB-si 2021 senesi avgust ayında tutulğan beş musulman qırımtatarğa qarşı "akimiyetni küçnen elgen keçirmege azırlıq" maddesi ile yañı cinayet davasınıaçqan.
2021 сенеси аvgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
İmam ise Rusiye Ceza kodeksiniñ 205.5 maddesine istinaden («Terror teşkilâtınıñ faaliyetinde iştirak etüv») qabaatlanıp tutulğan edi. O künü Kiyev rayon mahkemesi onı apiske aldı.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
