Rusiye FSB-si 2021 senesi avgust ayında tutulğan beş musulman qırımtatarğa qarşı "akimiyetni küçnen elgen keçirmege azırlıq" maddesi ile yañı cinayet davasını açtı. Bunı TASS Qırım ve Aqyar boyunca Rusiye FSB bölüginiñ matbuat hızmetine atfı etip bildirdi.
"Rusiye FSB-siniñ Qırı Cumhuriyeti ve Aqyar şeeri boyunca tahqiqat bölügi tarafından evel RF-nıñ beş vatandaşına qarşı Rusiye Ceza qanunnamesiniñ 205.5 maddesine binaen açılğan cinayet davasınıñ ("Terror teşkilâtınıñ faaliyetinde iştirak etüv") tahqikatı çerçivesinde Rusiye Ceza qanunnamesiniñ 30-ncı maddesiniñ birinci qısmına binaen yañı cinayet davası açıldı ("akimiyetni küçnen elgen keçirmege azırlıq"), - dep yazıla bildirmede.
FSB versiyasına köre, qabaatlanğanlar yarımadanıñ ealisi arasında "terrorcı mefküreni tarqatqanlar, yañı azalarnı terrorcı teşkilâtqa celp etkenler".
2021 сенеси аvgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
İmam ise Rusiye Ceza kodeksiniñ 205.5 maddesine istinaden («Terror teşkilâtınıñ faaliyetinde iştirak etüv») qabaatlanıp tutulğan edi. O künü Kiyev rayon mahkemesi onı apiske aldı.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
