Qırımtatar milliy areketiniñ faalcisi Nariman Celâl, Qırım tarihi desrliginiñ müelliflerini qorçalağan Rusiye Federatsiya Şurasınıñ azası Sergey Tsekovğa “işğalciler yardımcısı” dedi.
“Keçmişte Qırım şovinisti kibi belli olğan tovarişç Tsekov, 10-uncı sınıf talebeleri içün Qırım tarihi dersliginiñ müellifleriniñ tarafını tutacaq oldı. Özü o muarririyet şurasınıñ azası edi, amma, aytqanı kibi, kitap basılmağance, onı atta oqumadı. Amma buña baqmadan, desrlikte uydurmalar ve yalan yoq dep iddia ete. Bundan ğayrı, tovarişç, qırımtatarlar alâ daa “keçmişni qabul etip olamay” dep ayttı”, - dep yaza Celâl öz Facebook saifesinde.
Daa 1989-ıncı senesi SSSR Yuqarı Şurası, sürgünlikni qanunsız ve cinayet kibi tanıdı, 1991 senesi ise sürgün etilgen halqlarnıñ reabilitatsiya qanunınen, sürgünlikler aqsız-qanunsız tanıldı.
Matbuat bildirgenine köre, Tsekov, “qırımtatarlar aqqında derslik qısmı kerçekke uya, anda uydurılğan şey yoq” dep aytqan.
Qırımtatar Milliy Meclis reisi Refat Çubarov, ilhaq etilgen yarımadanıñ mekteplerinde tarqatılğan onuncı sınıf talebeleri içün “Qırım tarihi” rusiye dersligi, Ukraina Cinaiy Kodeksiniñ ameline oğray, dep bildirdi.
Çubarovnıñ aytqanına köre, bu derslik nümüneleri Ukraina uquq qoruyıcı organlarına berilgen muracaatlarğa qoşulacaq, ve “Qırımda işğal siyasetiniñ numayışını etmek içün” çeşit-türlü halqara meydanlarında kösterilecek.
Daa evel Qırımlı adliyeci, sanat ve tasil hadimleri, Qırımnıñ Rusiye tasil nazirligine muracaat etip, 10-uncı sınıflar içün S. V. Yürçenko muarririyetinde çıqqan «Qırım tarihı» dersligini mündericesinde qırımtatarlar aqqında bulunğan provokatsion ibareler sebebinden onı qullanuvdan çıqarmağa rica etti. Kitapta "tatar ealisiniñ ekseriyeti almanlarğa yahşı yanaşqan, çoqusı faal sürette yardım etken edi" dep yazılğan.
Qırım Tasil nazirliginiñ vekilleri adiseni şimdilik izaatlamadı.
