Rusiyeniñ Rostov-na-Donu Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» mabüsleri Cemil Gafarov, Servet Gaziyev, Seyran Murtaza, Erfan Osmanov ve Alim Karimovnıñ sıñırlav tedbirlerini uzattı. Bu aqta «Qırım birdemligi» cemaat birleşmesi haber ete.
«Gizli şaat ayartqan malümat berdi, advokat, o aynı vaqıtta eki protokolda bar, dep qayd etti. «Faritov» tahallüsli şaat beş mabüsten biri Rustem Şeyhaliyevnen camide tanıştı, soñra diniy-siyasiy toplaşuvlarğa barıp başladı, dep tarif etti. Daa soñra olarnı Rusiye Federatsiyasında yasaqlanğan «Hizb ut-Tahrir» teşkilâtı keçirgenini bildi. 2019 senesi mabüsler tutulğan soñ olarnı tanıdı. Şaat olarnı betlerinden ve adlarından bile, dep ayttı, amma soyadlarını qaydan bile öyle de aytıp olamadı, olarnı protokol tizilgende ögrendi, dep qayd etti», – dep aytıla haberde.
Ekinci protokolda şaat qabaatlanğanlarnı bir videoda tanıdı, dep qayd etile, onı, soñra belli olğanına köre, imaye tarafı daa baqmadı.
«Faqat advokat Taras Omelçenko mahkemeniñ diqqatını şaatnıñ birden eki protokolda olğanına celp etti. Faritov bunı tefsir etip olamadı. Soñra qabaatlayıcı Nadolinskiy mabüslerniñ sıñırlav tedbirini uzatuv muracaatını berdi, onıñ fikirince, buña ihtiyac qalmadı», – dep bildirdi «Qırım birdemligi».
Toplaşuvdan soñ mahkeme qabaatlavnıñ ricasını qanaatlendirdi. Mabüsler kelecek seneniñ martnıñ 20-ne qadar SİZOda qalacaq.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.