Kreml kontrolindeki Aqyarnıñ Lenin rayon mahkemesi «Hizb ut-Tahrir davasınıñ» mabüsi ve qırımtatar faali Rustem Murasovnıñ sıñırlav tedbirini 3 ayğa uzattı. SİZOda onı amamğa alıp ketmeyler, Murasovnı ekim de baqmay.
Bu aqta Qırım.Aqiqatqa «Qırım birdemligi» cemaat birleşmesi haber etti.
Advokat Emil Kurbedinovnıñ birleşmege aytqanına köre, Murasov diñlevlerde IV Jeneva Şartnamesi qullanılmalı, dep ayttı. Bundan ğayrı, o, «qırımtatar halqınıñ ayatında faal iştirak etkeni içün siyasiy sebeplerden» apiske alındı.
İmaye, mabüs qafeste tutulmamalı, çünki bu halqara şartnamege zıt kele, dep israr etti, amma mahkeme delillerge qulaq asmayıp, apis müddetini 2022 senesi yanvarniñ 11-ne qadar uzattı.
Rustem Murasovnıñ uquqçığa bildirgenine köre, Aqmescitteki SİZO-1 kamerasında tutuv şaraitleri dayanılmaz.
«Mantar, sıçavul, sıçan, böcekler, urba dımda qurumay», – dep ayta Kurbedinov.
Murasov, qomşu Rusiyeniñ Devlet Duma saylavlarında rey bermege barmasa, memuriyet onı tutuv şaraitlerini daa beter yapmağa vade etti, dep qayd etti.
Hatırlatamız, avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp bildirgenine köre, tutulğan qırımtatarlar «terror teşkilâtını qurğanından ve iştirak etkeninde» şübhelene.
Ukraina ombudsmanı Lüdmila Denisova avgustnıñ 17-nde tintüvlerden soñ tutulğan qırımtatarlarğa çıqarılğan qararnı «qanunsız» dep saya.
Qırım Muhtar Cumhuriyeti ve Aqyar prokuraturası yañı tintüvler ve qırımtatarlarnıñ tutuluvınen bağlı cinaiy tahqiqat başlattı.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
