Aqmescitteki «Hizb ut-Tahrir davasınıñ» mabüsi Emil Cemadenov Rusiye koloniyasında üç profilaktika qaydına alındı. Bu aqta «Qırım birdemligi» Cemadenovnıñ ömür arqadaşı Liana Belâlovanıñ malümatına esaslanıp haber ete.
Berilgen malümatqa köre, sentâbrniñ 18-nde Emil Cemadenov onı «ekstremist mefküresine meyilli, hadimlerge ücüm etmege meyilli, iç nizam qaidelerini bozmağa meyilli olğanı içün» üç profilaktika qaydına alındı, dep haber etti.
«Olar zaten daima ceza izolâtorında buluna, ve daa böyle profilaktika qaydları kirsetildi», – dep tefsir etti rejim sertleşkenini Belâlova.
Mabüs içün profilaktika qaydı quvetleştirilgen qaravul ve evelden azat etüv ve ceza çeküv şaraitleriniñ yımşatılması demek.
Rusiyeniñ Cezalarnı yerine ketirüv federal hızmeti Cemadenovnıñ tuvğanları bergen malümatnı açıq şekilde tefsir etmey.
Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davası» mabüsleriniñ ükmüni 2019 senesi iyün ayında çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
