Rostov-na-Donu Ukraina Baş konsulı Taras Malışevskiy «Hizb ut-Tahrir davaları» boyunca qabaatlanğan Ernest İbragimov, Oleg Fedorov ve Yaşar Şihametovnen körüşti. Olarnı Rostovnıñ SİZO-1-nde tutalar. Bu aqta «Qırım birdemligi» bildire.
Malışevskiyniñ aytqanına köre, Ernest İbragimov etapqa zornen dayandı.
«Krasnodarda 12 kişilik kamerada 25 insannen qalmağa mecbur oldı, soñra bir ay Novorossiysk SİZOsınıñ kövid karantininde tedaviylenmeyip bulundı. Etapta aşı olmaqtan vazgeçti. Avgustnıñ 12-nden berli siyasiy mabüs Rostov-na-Donudaki SİZO-1-de 6 kişilik televizorlı kamerada buluna, kezintileri ola ve tibbiyet hadimleri baqa. Sağlıq şikâyetleri yoq», – dep bildire faaller diplomatnıñ malümatına esaslanıp.
Bu malümatqa köre, 51 yaşında Oleg Fedorov da Aqmescitten Rostov-na-Donuğa avuştırıluvına zor dayandı. Keriç, Krasnodar ve Novorossiyskten keldi. Tranzit kamerasında sıcaqnen yatqanını tarif etti.
«Turıp olamağan edi. Soñra Fedorov hastahanege alındı, onıñ kameradan çoq farqı yoq edi – dımlı bir yer, avalandıruv ve çalışqan kenef yoq», – dep ayttı Malışevskiy.
Haber etilgenine köre, Fedorov 8 kişilik kamerada Riza İzetovnen beraber tutula, kamerada televizor ve buzdolabı bar, şaraitlerni şikâyet etmeyler.
Diplomatnıñ aytqanına köre, Yaşar Şihametov da Qırımdan avuştıruv şaraitleri ve Krasnodar SİZOsında qaluv aqqında tarif etti. Anda töşeksiz yataqta yuqladı, kameranıñ unitazı ve musluğı bozulğan edi, soñra trennen «stolıpin vagonlarında» sıcaqta daa 10 insannen beraber Rostov-na-Donuğa ketirildi.
«Şihametovnıñ büyrekleri ve qaracigeri ağıra, közleri zayıflaşa. Sentâbrniñ 15-nde SİZOdan Cenübiy okrugınıñ arbiy mahkemesine oturışuvğa çıqarılğan edi, amma oturışuv öyle de olmadı. Sebeplerini oña aytmadılar ve 5 saat mahkeme binasınıñ mağazından tutqan soñ Yaşarnı SİZO-1 kamerasına qaytardılar. O, büyük degil, 3 kişilik, aralarında semetdeşi bar», – dep bildirdi baş konsul.
Kelecek afta Malışevskiy Timur Yalkabovnen körüşmege planlaştıra.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
