Link açıqlığı

Saatnıñ esas haberi

Ukraina ombudsmanı «Hizb ut-Tahrir davası» mabüslerini gece namaz qılğanı içün ceza izolâtorına alınğanını «tsinik» dep adlandırdı


Lüdmila Denisova
Lüdmila Denisova

Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovanı gece namaz qılğanları içün ceza izolâtorına alınğan Aqmescitteki birinci «Hizb ut-Tahrir davasınıñ» mabüsleri Ayder Saledinov ve Rustem İsmailovğa qarşı kerekli tedbir almasına çağırdı.

Bu aqta Lüdmila Denisova Facebook saifesinde haber etti.

«Koloniya memuriyetiniñ areketleri tsinik ola, çünki Qurban bayramında musulmanlar içün namaz farz ola. İcra müessisesi hadimleriniñ qırımtatarlarğa qarşı yañlış munasebeti halqara standartlarğa zıt kele. Er bir insannıñ dinni serbest kütmege aqqını bergen Umumiy insan aqları beyannamesiniñ 18-inci maddesi ve İnsan aqlarını qoruv şartnamesiniñ 9-ıncı maddesi bozula», – dep aytıla haberde.

Daa evel haber etilgenine köre, 11,5 ve 13,5 apis cezasına mahküm etilgen Aqmescitteki ekinci «Hizb ut-Tahrir davasınıñ» mabüsleri Ayder Saledinov ve Rustem İsmailov gece namaz qılmağa tırışqanları içün ceza izolâtorına alındı.

Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı. Daa soñra Rusiye Yuqarı mahkemesi qırımlılarnıñ ükmüni deñiştirdi.

Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.

Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.

«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG