Rusiyeniñ Rostov-na-Donu cenübiy okrugınıñ arbiy mahkemesi «Hizb ut-Tahrir davasınıñ» mabüsi Emil Ziyadinovnıñ imayesi bergen stenogrammanıñ sahte oluv ihtimalını tahqiq etmek talabınen üç muracaatını red etip, tek onı tizgen quvetçini çağırmaq ricasını qabul etti. Bu aqta «Qırım birdemligi» cemaat birleşmesi haber etti.
«İmayeniñ ses qaydlarına köre tizilgen stenogrammanıñ kerçek olmağanınen bağlı muracaatı bunı qısqa müddet içinde azırlamağa imkânsız olğanını aytqan mustaqil ekspert Yelena Novojilovanıñ hulâsasına esaslandı. Bu sebepten advokat İslâm Velilâyev şaatlarnı çağırmağa rica etip, olar sesniñ şifr yapılğanını kerçekten kördimi soramağa istedi. Mahkeme devlet qabaatlayıcısınıñ aytqanlarınen razı olıp, bu «esnasnı esassız sozar» dep red etti. Soñra mustaqil ekspert Novojilovanı sorğuğa çağıruv muracaatı keldi, amma mahkeme kene qabaatlav tarafını tutıp, azırlağan hulâsası dava malümatına yazma şekilde ilâve etildi, dep qayd etti. Tahqiqat içün ekspertiza tizgen tilşınas ekspert Yekaterina Paleha ve dinşınas İlşat Muhamedzaripovnı çağıruv muracaatı da mahkeme tarafından red etildi, prokuror tedqiqatnı «açıq ve añlayışlı» dep adlandırdı», – dep aytıla haberde.
Neticede mahkeme esasında ekspert hulâsası tizilgen disklerniñ stenogrammasını yapqan FSB tahqiqatçısı Dmitriy Gramaşovnı sorğuğa çağırmağa izin berdi.
Ziyadinov mahkemeni red etti, amma qadılar kollegiyası bu muracaatnı qanaatlendirmedi.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
