Aqmescitteki «ekinci Hizb ut-Tahrir beşiniñ» diñlevleri advokat Edem Semedlâyev apiste olğanı içün ve başqa imayeciler olmağanı içün başqa künge qaldırıldı. Bu aqta «Qırım birdemligi» cemaat birleşmesi haber ete.
«Aqmescitteki ekinci gruppa» erkânına Raim Ayvazov, Farhod Bazarov, Remzi Bekirov, Riza İzetov ve Şaban Umerov kire.
«Edem Semedlâyev başqa künge qaldıruv muracaatını mahkemege berdi. Tayin etilgen advokat ve devlet qabaatlayıcısınıñ vekili oña bir ağızdan qoltuttı ve oturışuv bugün kelmegen advokatlar, şu cümleden Semedlâyev kele bilecek ve müvekkillerniñ imayesini temin etecek künge qaldırılmalı, dep bildirdi», – dep aytıla haberde.
Nevbetteki oturışuv noyabrniñ 29-nda saba saat 10-da başlanacaq. Beklenilgeni kibi, oturışuvda video konferentsiya bağı vastasınen gizli şaat «İsmailov» sorğuğa çekilecek.
Avgust ayında Rostov-na-Donu Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» mabüsleri jurnalist Remzi Bekirov, aq qorçalayıcı Riza İzetov, faaller Farhod Bazarov, Raim Ayvazov, Şaban Umerovnıñ SİZOda qaluv sıñırlav tedbirlerini dekabrniñ 15-ne qadar uzattı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
