Qırımtatar faalleri Rostov-na-Donuda «Hizb ut-Tahrir davası» boyunca mahküm etilgen qırımtatarlarğa qoltutmaq içün flashmobqa çıqtı.
«Qırım birdemligi» bildirgenine köre, 150 insan qırımtatarlarğa qoltutmaq içün Qırımdan keldi. Üküm seslendirilgen soñ yazuvlı urba kiygenler: «Dinni ögrenmek terrorizm degildir», «Devlet terrorı toqtatılsın», «Repressiyalar toqtatılsın», «Qoranta repressiyaları toqtatılsın», «Qırımtatarlar terrorist degildir». Ruslan Nagayevniñ qızı oturışuvğa «Baba, sizni sevemiz, bekleymiz, inanamız» yazılı urbada keldi.
Avgustnıñ 16-nda saba Rostov-na-Donu Cenübiy okrugınıñ arbiy mahkemesi Aluştadaki «Hizb ut-Tahrir davasınıñ» mabüsleri, qırımtatarlar Ruslan Nagayev, Eldar Kantimirov, Lenur Halilov ve Ruslan Mesutovğa üküm çıqardı. Mesutov ve Halilov 18 yılğa, Nagayev 13 yılğa, Kantimirov 12 yılğa üküm etildi.
Üküm çıqarılğanda tek altı insan mahkemege kirsetildi: Eldar Kantimirovnıñ anası, Lenur Halilovnıñ ömür arqadaşı, Ruslan Nagayevniñ qızı ve Ruslan Mesutovnıñ qız qardaşı.
Mahküm etilgenlerniñ advokatları ükümni «qanunsız» dep saya.
Qırımda qırımtatarlar Ruslan Nagayev, Eldar Kantimirov, Lenur Halilov ve Ruslan Mesutovğa qoltutuv duaları yapıldı.
Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.
Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.
«Memorial» aq qorçalayıcı merkezi Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
