Qırımda qırımtatarlar Ruslan Nagayev, Eldar Kantimirov, Lenur Halilov ve Ruslan Mesutovğa qoltutuv duaları yapıldı. Bazarertesi künü, avgustnıñ 16-nda, Rostov Cenübiy okrugınıñ arbiy mahkemesi Aluştadaki «Hizb ut-Tahrir davasınıñ» ükmüni çıqaracaq.
«Qırım birdemligi» bildirgenine köre, dua Saq rayonınıñ Temeş (Şelkoviçnoye), Qarasuvbazar rayonınıñ Aq Qaya, Aqmescit rayonınıñ Qulçuq (Rodnikovo), Canköy rayonınıñ Cadra (Lobanovo) köylerinde ve diger yerlerde keçirildi.
«Toplaşqanlar Allahqa dua etip, dindaşlarınıñ tez vaqıtta azatlıqqa çıqmasını istedi. Kelgenler birdemligini kösterip, siyasiy mabüslerniñ qorantalarına qoltutqanını bildirdi», – dep aytıla haberde.
Avgustnıñ 16-nda Eldar Kantimirov, Ruslan Nagayev, Ruslan Mesutov ve Lenur Halilovnıñ üküm çıqarılması planlaştırıla.
Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.
Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.
«Memorial» aq qorçalayıcı merkezi Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
