Qırımdaki «Hizb ut-Tahrir davasınıñ» mabüsi Vadim Bektemirov SİZOda bir aftadan berli yüksek sıcaqnen yata ve kerekli tibbiy yardım alamay. Bu aqta «Qırım birdemligi» birleşmesi Qırım.Aqiqatqa bildirdi.
Advokat Safiye Şabanovanıñ birleşmege tarif etkenine köre, Rusiyedeki Vlasiha arbiy mahkemesinde Aqmescitteki ekinci «Hizb ut-Tahrir davasınıñ» imayecileri bergen istinaf şikâyeti bağılğanda mabüslerden biri Rustem Seythalilov ve aynı kamerada oturğanlarnıñ hastalanğanı belli oldı. Vadim Bektemirov da anda tutula.
Seythalilovnıñ imayecisine bildirgenine köre, Bektemirovnıñ bir qaç künden berli sıcağı yüksek, amma tibbiy bölük ekimleri paratsetamoldan ğayrı bir şey teklif etip olamay.
«Uquqçılar «Hizb ut-Tahrir» davalarında çoq aytqan edi, COVID-19 pandemiyası şaraitlerinde (SİZOda qaluv – QA) müvekkilleriniñ ayatları içün telükeli ola, lâkin mahkemeler apiste qaluv müddetlerini uzatmağa devam ete», – dep qayd etti advokatlar.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
