Bağçasaray «Hizb ut-Tahrir davasınıñ» mabüsi Zekirya Muratov pnevmoniya şübesi ile FSİN hastahanesinde yata. Bunı «Qırım birdemligi» cemaat birleşmesi Rostov-na-Donudaki Ukraina baş konsulı Taras Malışevskiyge atfı etip bildire.
«Esli-başlı siyasy mabüs koronavirusqa oğramağan, test menfiy çıqqan. Amma pnevponiya şübesi bar. Oña rentgen yaptılar. 1-nci SİZO-nıñ tibbiyet bölüginiñ reberi Zekirya Muratov idareniñ hastahanesinde kerekli tibbiy yardım ala, dep bildirdi», – dep yazıla bildirmede.
Ukraina Yuqarı Radasınıñ insan aqları vekâletlisi Lüdmila Denisova Rusiye SİZOsında Bağçasaraydaki «Hizb ut-Tahrir davasınıñ» mabüsi, apiske alınğan qırımtatarı Zekirya Muratovğa tibbiy yardım kösterilmey, dep bildirdi. Denisova, Rusiye akimiyetinden qırımlınıñ tibbiy hızmetlerge irişimini temin etmege talap etti.
İyünniñ 8-nde Vlasiha (Rusiye) İstinaf mahkemesi Zekirya Muratovnıñ sıñırlav tedbirini deñiştirmedi.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi aprelniñ 21-nde Bağçasaraydaki «Hizb ut-Tahrir davasınıñ» mabüsi Zekirya Muratovnıñ sıñırlav tedbirini üç ayğa – avgustnıñ 17-ne qadar uzattı.
2020 senesi dekabr ayında Zekirya Muratovnıñ Qırımdan Rusiyege etap etilgeni belli oldı. Rusiye quvetçileri Zekirya Muratovnı iyülniñ 7-nde tuttı. FSB, onı «Hizb ut-Tahrir» bölüginde iştirak etkeninde qabaatlay.
Rusiye quvetçileriniñ areketlerini Ukraina prezidentiniñ Qırım Muhtar Cumhuriyetindeki daimiy temsilciligi takbih etti, Qırım Muhtar Cumhuriyeti ve Aqyardaki Milliy politsiya Baş idaresi tintüvler aqqında Ukraina Ceza kodeksiniñ 162-nci maddesiniñ 2-nci qısmına (mesken tiyilmemezligini bozuv) ve Ukraina Ceza kodeksiniñ 146-ncı maddesiniñ 2-nci qısmına (qanunsız alda azatlıqtan marum etüv) istinaden cinaiy tahqiqat başlattı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
