Ukraina ombudsmanı Lüdmila Denisova Qırımdaki «Hizb ut-Tahrir davasınıñ» mabüsi Yaşar Şihametovnıñ sağlıq vaziyeti fenalaştı, dep bildirdi. Onıñ aytqanına köre, «yürek, qara ciger ve aşqazan problemleri ağırlaştı».
«Ukrainalı siyasiy mabüs, qırımtatarı Yaşar Şihametovğa acele tibbiy tedqiqler ve tedaviylev kerek. Yürek, qara ciger ve aşqazan problemleri ağırlaştı. Hronik gipertoniya sebebinden Yaşar büyrek ağrılarınen çekişe», – dep yazdı Denisova Facebook saifesinde.
Denisovanıñ bildirgenine köre, Şihametovnıñ iyün ayına planlaştırılğan tibbiy tedqiqler yapılmadı, Aqmescit SİZOsınıñ memuriyeti ise tibbiy yardım ricalarını körmemezlikke urmağa devam ete.
Denisova Rusiye insan aqları vekâletlisi Tatyana Moskalkovağa muracaat etip, Yaşar Şihametovnı tibbiy tedqiqlernen temin etmege ve tibbiy müessisede kerekli tibbiy yardım köstermege talap etti.
Ukraina ombudsmanı halqara toplulıqqa muracaat etip, bu vaziyetke cevap bermesini ve Qırım ve Rusiyede ukrainalı siyasiy mabüslerge qarşı işkence toqtatılması içün kerekli tedbirler qabul etmesini rica etti.
Aqmescit SİZOsınıñ memuriyeti Lüdmila Denisovanıñ aytqanlarını açıq şekilde daa izaatlamadı ve Qırımdaki «Hizb ut-Tahrir davasınıñ» mabüsi Yaşar Şihametovnıñ sağlıq vaziyeti aqqında bildirmedi.
Daa evel berilgen malümatqa köre, Moskva kontrolindeki Yedi Quyu rayon mahkemesi Yaşar Şihametovnı apiste tutuv müddetini 2021 senesi avgust ayına qadar uzattı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi. Tahqiqat tedbirleri keçirilgende tutulğan insanlarnıñ tuvğanlarına berilgen malümatqa köre, olar Rusiye Ceza kodeksiniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv – muar.) qabaatlana.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
