Üç kün içinde Aqmescitteki ekinci «Hizb ut-Tahrir davasınıñ» mabüsi Cemil Gafarovnı tibbiy tedqiqlerge çıqarmağa mecburlar.
Bu aqta Gafarovnıñ advokatı Rifat Yahin yanvarniñ 23-nde Qırım.Aqiqat mühbirine bildirdi.
Advokatnıñ aytqanına köre, Aqmescit SİZOsınıñ reberligi vesiqalarnı resmiyleştirdi.
«Bugün (yanvarniñ 23-nde – QA) SİZOnıñ müvekkilime qarşı areketsizliginen bağlı davam baqılğan mahkeme oturışuvında anda bulunğan SİZO vekiline bir messencer vastasınen, ğaliba, WhatsAppta apiste tutuv içün mania olğan hastalıqlarnı qayd etmek içün Cemil Gafarovnı tibbiy tedqiqlerge yollamaq qararı keldi, SİZO yolbaşçısı Berejnoy onı bugünniñ sanı altında imzaladı. Yarından itibaren üç kün içinde Gafarovnı tibbiy tedqiqlerge alıp ketmege mecburlar, yanvarniñ 31-ne qadar alına dair qarar berilmeli», – dep qayd etti advokat.
Onıñ bildirgenine köre, ariza berilgeninden berli üç ayğa yaqın müddet keçti.
«Gafarovnı tibbiy tedqiqlerge yollav arizasını 2019 senesi noyabrniñ 5-nde berdim, onı ertesi künü baqıp, qarar çıqarmaq kerek ediler, lâkin körgenimiz kibi, aman-aman üç ay keçti, ve bu yollanma bugün peyda oldı, SİZOğa qarşı memuriy dava baqılğanda», – dedi Yahin.
Yanvarniñ 16-nda olıp keçken qapalı oturışuvda qadı Cemil Gafarovnı apiste qaldırdı.
Aqmescitteki ekinci «Hizb ut-Tahrir davasınıñ» mabüsi Cemil Gafarov oktâbrniñ 25-nden berli Aqmescit SİZOsında kerekli ilâclar almay, dep bildirdi advokatı.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüsler Cemil Gafarov, Server Gaziyev, Enver Ömerov ve Asan Yanikovnıñ (Qırımdaki «Hizb ut-Tahrir davalarınıñ» mabüsleri) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
