Rostov-na-Donudaki Cenübiy bölgeniñ arbiy mahkemesi «Hizbt ut-Tahrir» davasınıñ mabüsi, arap tili mütehassısı İsmet İragimovnıñ tevqif müddetini 2021 senesi oktâbrniñ 24-nece uzattı.
Bunı «Qırım birdemligi» cemaat birleşmesi haber etti.
İbragimovnıñ advokatı Ayder Azamatovnıñ bildirgenine köre, qabaatlav tarafı mahkemelengen Qırımdan ketip olğanına ya da daa sorğuğa çekilmegen şaatlarnı sıqıştıracağına atfı etip tevqif müddetiniñ uzatılmasında israr etken.
«Avropa İnsan aqları mahkemesiniñ qararına köre, şaatlarnıñ ayatı telüke altında olğanı ve qaçma telükesi olğanı aqqında konkret deliller taqdim etilmeli. Prokuror ise bunı yapmadı», – «Qırım birdemligi» advokatnıñ aytqanlarından alıntı ketire.
İbragimovnıñ yarımadanı terk etip ketemeycegi aqqında delil olaraq Ayder Azamatov müşterisiniñ üç çağına yetmegen balası olğanı, Qırımnen bağlı olğanı ayttı.
«Memorial» aq qorçalayıcı merkezi «Hizb ut-Tahrir davasınıñ» mabüsi olğan İsmet İbragimovnı siyasiy mabüs olaraq tanıdı.
İsmet İbragimov 2020 senesi iyülniñ 7-nde Aqmescit rayonınıñ Kurtsı qasabasında tutuldı. O künü daa altı qırımtatarı tutulğan edi. İbragimov Rusiyede ve işğali altındaki Qırımda yasaqlanğan «Hizb ut-Tahrir» faaliyetini teşkil etkeninde qabaatlana.
Rusiyeniñ Rostov-na-Donu Cenübiy okrugınıñ arbiy mahkemesi fevralniñ 3-nde «Hizb ut-Tahrir davasınıñ» mabüsi olğan arap tili mütehassısı İsmet İbragimovnıñsıñırlav tedbirini yarım yılğa uzattı.
Martnıñ 20-nde Rusiyedeki mahkeme İbragimovnıñ apis müddeti uzatılmasına qarşı berilgen istinaf şikâyetini red etti.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
