Rusiyeniñ Vlasiha şeerindeki Arbiy istinaf mahkemesi «Hizb ut-Tahrir davasınıñ» mabüsi olğan arap tili mütehassısı İsmet İbragimovnıñ davası boyunca sıñırlav tedbirini 6 ayğa uzatuv istinaf şikâyetini baqtı.
Qarar deñiştirilmedi, dep haber ete «Qırım birdemligi» cemaat teşebbüsi.
Advokat Ayder Azamatov İbragimovnı qorantasından uzaq tahqiqat izolâtorında tutmaq içün sebep yoq dep, oña nisbeten Ukraina vatandaşına olraaq IV Jeneva şartnamesini qullanmağa rica etti. Mahkeme keç başladı, esnas videokonferentsiya vastasınen keçirildi – qadı Vlasihada, tercimannen advokat Qırım garnizon arbiy mahkemesinde, İsmet Rusiyeniñ Rostov-na-Donudaki SİZO-1-de bulundı.
«Mahkeme beklenilgeni kibi sıñırlav tedbirini deñiştirmedi», – dep qayd etti Azamatov. Böylece, İsmet İbragimov 2021 senesi iyülniñ 1-ne qadar apiste qalacaq.
İbragimov tayinlengen advokattan azat etilüv aqqında muracaat etti ve mahkeme bu ricasını qabul etti.
Advokatnıñ aytqanına köre, martnıñ 25-nde Rostov-na-Donu Cenübiy okrugınıñ arbiy mahkemesi İsmet İbragimovnıñ davasını temelden baqacaq, müvekkil advokatınen beraber mahkemede olacaq.
Hatırlatamız, Rusiyeniñ Rostov-na-Donu Cenübiy okrugınıñ arbiy mahkemesi fevralniñ 3-nde «Hizb ut-Tahrir davasınıñ» mabüsi olğan arap tili mütehassısı İsmet İbragimovnıñ sıñırlav tedbirini yarım yılğa uzattı.
Aqmescitte Rusiye kontrolindeki Qırım Yuqarı mahkemesi istinaf şikâyetini red etip, İsmet İbragimovnı 2021 senesi martnıñ 2-ne qadar apiste qaldırdı.
İsmet İbragimov 2020 senesi iyülniñ 7-nde Aqmescit rayonınıñ Kurtsı qasabasında tutuldı. O künü daa altı qırımtatarı tutulğan edi. İbragimov Rusiyede ve işğali altındaki Qırımda yasaqlanğan «Hizb ut-Tahrir» faaliyetini teşkil etkeninde qabaatlana.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
