Rusiyede Rostov-na-Donunıñ Cenübiy bölgesiniñ arbiy mahkemesi ekinci Aqmescit Hizb ut Tahrir davasında mahkeme tahqiqatını tamamladı. Bu gruppada Remzi Bekirov, Riza İzetov, Şaban Ümerov, Farhad Bazarov ve Raim Ayvazov. Bunı advokat Edem Semedlâyev haber etti.
«Diñlevler vaqtında advokatlardan biri Nazim Şeyhmambetov mustaqil ekspertler tahqiqatnı esassız tanılğanları içün ekinci til ve diniy ekspertizanıñ keçirilmesini aqqında muracaat etti. Mahkeme böyle bir muracaatnı vaqtından evel saydı, amma bu protseduranıñ RF qanunlarına uyğun sayğanını bildirdi. Bundan ğayrı mahkemelengenler sorğuğa çekildi. Episi ifadelerinde terrorcılıqqa alâqası olmağanını ve Rusiyede akimiyetni elge keçirmege planlaştırmağanını ayttılar. Farhod Bazarov ise qabaatsız olğanına atfı etip, şaatlıq etmekten red etti», – dep haber ettiler Qırım birdemliginde.
Munaqaşalar 2022 senesi yanvarnıñ 17-ne planlaştırılğan.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
