"Hizb ut-Tahrir davası" boyunca tevqif etilgen Canköy rayondan üç qırımtatarnı mecburiy psihiatrik ekspertizadan keçmege yollağanlar. Bunı "Qırım birdemligi" cemaat birleşmesi haber etti.
Al-azırda Halil Mambetov, Ekrem Kroş ve Refat Seydametov Rusiyeniñ nezareti altında olğan 1-nci Qırım cumhuriyet klinik psihiatriya hastahanesindedirler.
Sedametovnıñ advokat Aleksey Ladin uquq qoruyıclarğa bildirdi ki, onı müvekkili hastahanege etap etilgeni aqqında Qırım FSB tahqiqatçısı haberdar etken. Ekspertiza müddeti ekimlerniñ qararına bağlıdır, lâkin 28 künde çoq olmamalıdır.
Ladinniñ sözlerine köre, bu qararnı temyiz etmek manasızdır.
"Şikâyet berilgen taqdirde mahkeme ve prokuratura tahqiqatçınıñ bunı yapmaq aqqı bar olğanını manaçıq eter", - dedi advokat.
Siyasiy mabüslerniñ tuvğanları olarnı hastahanede ziyaret etip olamağanlar.
Yanvarniñ 24-nde saba işğal etilgen Qırımnıñ Canköy şeeri ve rayonında Rusiye quvetçileri qırımtatarlarnıñ evlerinde tintüv keçirdi: Nemse Canköy köyünde (Blijnegorodskoye) Ekrem Kroşnıñ, Timofeyevka köyünde Ayder Asanov ve Refat Seydametovnıñ, Çoqraqlı Şeyh Eli (Dneprovka) Osman Abdurazakovnıñ, Canköyde Löman Zekiryayev ve Halil Mambetovnıñ evlerinde.
Ekrem Kroşnıñ ömür arqadaşı Amideniñ «Qırım birdemligi» cemaat birleşmesine bildirgenine köre, Qırımnıñ şimalinde tutulğan qırımtatarlar «terrorizmde» qabaatlana bile. Mustaqil advokatlarğa qırımlı musulmanlarnıñ yanına keçmege izin berilmedi.
Daa soñra belli olğanına köre, yanvarniñ 24-nde saba Canköyde ve Canköy rayonında tutulğanlar terror teşkilâtını teşkil etüv ve faaliyetinde iştirak etüv ile qabaatlanalar (RF Ceza qanunnamesiniñ 205,5 maddesi – QA). Laf Rusiyede yasaqlanğan «Hizb ut-Tahrir» teşkilâtı aqqında kete.
Qırımnıñ işğal yolbaşçısı Sergey Aksönov qırımtatarlarnıñ evlerinde keçirilgen tintüvlerni izaatlap, quvetçiler «Ukrayına ile alâqalarda» qabaatlanğan altı kişini yaqalağanını bildirdi.
Ukrayına prezidentiniñ Qırım Muhtar Cumhuriyetindeki daimiy temsilciligi Qırımnıñ şimalinde Ukrayına vatandaşlarınıñ tutuluvını takbih etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
