Aqyarda “Hersones Tevriçeskiy” müzey qoruğından Ekinci Cian cenkinden qalğan eki patlayıcı nesnelerni alıp çıqtılar. Bu aqta müzey matbuat hızmetinin sözlerinden rusiye matbuatı yaza.
“Cenk vaqtından qalğan eki patlayıcı nesne tapıldı, amma müzey qoruğınıñ işine bu iç tesir etmedi. Kiriş açıq edi, snarâdlar tapılğan yerniñ etrafı ise sarılıp alınğan. Mütehassıslar mermilerni müzey qoruğınıñ toprağından alıp çıqtı”, - dep yaza “RİA Novosti Krım” müzey hadiminiñ sözlerinden.
Daa evel «Hersones Tavriçeskiy » müzey qoruğı «şübheli nesne» tapılğanından sebep politsiya tarafından sarıp alınğanı bildirile edi.
Hersones Tavriçeskiy Qırımnıñ cenübiy-ğarbiy yalısında qadimiy yunanlar tarafından quruldı. Al-azırda bu Aqyar toprağı sayıla. Eki biñ yıl devamında Hersones Şimaliy Qara deñiz sailleriniñ büyük siyasiy, medeniy, iqtisadiy merkezi oldı.
2014 senesine qadar çeşit memleketlerniñ talebe ve studentleri Hersonesteki eski şeylerni qazıp çıqarmağa kele edi. Yıl devamında 2-3 halqara konferentsiya keçirile edi. 2013 senesi Hersones UNESCO dünya mirasınıñ cedveline kirsetilgen edi. 2014 senesinden berli UNESCO müzey qoruğınıñ monitoringini keçirmey.
2018 senesi Aqyarnıñ Rusiye akimiyeti Hersones viranelerinde opera sanasını ve hocalıq inşaatlarını qurdı. Qadimiy divarlar altında yüksek voltlı kabel qoyulğan edi.
