Hersonda mayısnıñ 18-nde 1944 senesi qırımtatar halqı genotsidiniñ qurbanlarına hatıra taşı açıldı, dep bildire Qırım.Aqiqat mühbiri.
Hatıra taşı qırımtatar halqı genotsidi qurbanlarınıñ hatıra alleyasında «Yubileynıy» kinokontsert salonı yanındaki skverde tiklenildi.
«Hatıra taşı – 2015 senesi başlağan ikâyeniñ mantıqlı devamıdır, qırımtatar cemiyeti hersonlılarnen beraber çıqıp, sürgünlik qurbanları hatırasına küçük bir skver temelini qoydı. Eñ esası – qırımtatar halqı genotsidiniñ qurbanlarına tiklengen hatıra taşıdır», – dep tarif etti Herson şeer Meclisiniñ reisi İbragim Suleymanov.
Qırımtatar halqı aqlarını qoruv komitetiniñ koordinatorı Abmecit Suleymanovnıñ aytqanına köre, hatıra taşınıñ tiklenmesi Ukraina tarafından qırımtatar halqı içün maneviy destek adımı ola.
Mayısnıñ 18-de Ukraina ve dünyada 1944 senesinde qırımtatar halqınıñ Qırımdan sürgün etilmesi qurbanlarını hatırlaylar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Şu künü qırımtatarlar halqınıñ Qırımdan sürgün etilüviniñ qurbanları hatırasına çeşit añma tedbirleri keçirile.
Ukraina Yuqarı Radasınıñ qararına binaen, mayıs 18 künü Qırımtatar halqınıñ genotsidi qurbanlarınıñ hatıra künü dep ilân etildi.
