Herson vilâyetiniñ devlet memuriyetiniñ başı Yuriy Gusev, mayıs ayında ilhaq etilge Qırım yarımadasına "Dünya – zorbalıq ve işğalge qarşı. Menlik yürüşi" silâsız yürüşni keçirmek teşebbüsine qol tuta.
"Men qırımtatarlarnıñ bu teşebbüsi aqqında eşittim. Menim içün Qırım Ukraina edi, bar ve olacaq. Vem şübesiz, biz Aqmescit ve Aqyar memuriy binalarınıñ üstüne Ukraina devlet bayraqlarını qaytarırmız. Men bellesem, bugün biz halqara topluluq ile Qırımnı qaytarmağa yardım etecek çarelerni körmelimiz", - dedi Gusev.
O, baarde Hersonda Qırım künleri keçirilecegini de qoştı.
"Mart ayında Hersonda Qırım künlerini keçirecek olamız, anda qırımtatar Milliy Meclis vekillerini teklif etecekmiz. Bunı QMC-nde prezident vekili ile muzakere ettik", - dedi Gusev.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Refat Çubarovnıñ aytqanına köre, yürüş teşkilâtçıları yapqan areketlerini Ukraina akimiyetinen keliştirmege «tırışacaq».
Yanvarniñ 22-nde Çubarov Qırım yürüşi mayısnıñ 2-nde keçirilecek, dep ayttı. Meclis reisi, işğal altındaki yarımadağa küç qullanıp kireceklerini de inkâr etmey.
Rusiye kontrolindeki Qırım yolbaşçısı Sergey Aksenov ilân etilgen yürüşni provokatsiya dep adlandırıp, «sert qarşılıq kösterilecegini» vade etti.
