Herson vilâyetiniñ akimiyeti işğal etilgen Qırımnıñ memuriy sıñırında tasil malümat noqtalarını açmağa teklif ete. Bu aqta yanvarniñ 13-nde vilâyet devlet memuriyetindeki selektor toplaşuvında aytıldı, dep haber ete Qırım.Aqiqat mühbiri.
Böyle teklifni Herson vilâyetiniñ devlet memuriyeti tasil, ilim ve gençlik departamenti müdiriniñ muavini Nina Levenets seslendirdi. Onıñ aytqanına köre, 2017 senesinden başlap «Qırım – Ukrainadır» tasil merkezleri üzerinden 234 qırımlı abituriyent Herson aliy oquv yurtuna oqumağa kirdi, olardan 76 insan 2019 senesi oquşqa başladı.
«2019 senesi 600 muracaat oldı ve tek 76 kişi oqumağa kirdi – bu yeterli degil. Daa faal çalışıp, Qırım sakinlerine böyle imkân aqqında malümat bermek kerek – Herson vilâyetinde aliy tasil aluv imkânı. «Çonğar» ve «Kalançak» keçiş noqtalarında memuriy hızmet merkezlerini açmağa teklif etemiz», – dep teklif etti Levenets.
Herson vilâyetinde qırımlılar ve memleket içinde köçip kelgenler içün «mesken şeerçikni» qurmağa niyetleneler.
2019 senesi dekabrniñ 19-nda Ukraina baş naziriniñ muavini Dmıtro Kuleba «Kalançak» keçiş noqtasında hızmet alanını açtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
