Herson vilâyetinde qırımlılar ve memleket içinde köçip kelgenler içün «mesken şeerçikni» qurmağa niyetleneler. Yanvarniñ 13-nde vilâyet devlet memuriyetiniñ toplaşuvında belli teklifler şekillendirildi, dep bildirdi Herson vilâyeti devlet memuriyetiniñ reis muavini Serğiy Kozır.
Onıñ malümatına köre, mesken Geniçeskte 4,5 ga topraqta qurulacaq.
«336 daireli altı dört qatlı eki kirişli ev qurulması beklenile. Leyhanıñ tahminiy fiyatı – 160 mln ğrn», – dep yazdı Herson memurı Facebookta.
Kozırnıñ qayd etkenine köre, al-azırda maliye destek alıp, qurucılıqnı başlatmaq içün Ukraina cemiyet ve topraq inkişafı nazirligine muracaat azırlanıla.
2019 senesi dekabrniñ 19-nda Ukraina baş naziriniñ muavini Dmıtro Kuleba «Kalançak» keçiş noqtasında hızmet alanını açtı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
