Herson şeer Meclisi, koronavirus sebebinden memlekette fevqulâde vaziyet ilân etilse, semetdeşlerini ihtiyaclarını qarşılap olamağanlarğa elinden kelgeni qadar yardım etmelerine çağıra. Bu aqta Meclisniñ saytında aytıla.
«Eñ yaqın vaqıtta memlekette (ya da Herson şeerinde) fevqulâde vaziyet ilân etilmesi mümkün, bu vaziyette vatandaşlarnıñ areketleri qısmen ya da tamamen yasaqlanacaq, Herson şeer Meclisi semetdeşlerine – qırımtatarlarğa – muracaat etip, bu müddet devamında ihtiyaclarını qarşılap olamağanlarğa elinden kelgeni qadar yardım etmelerini rica etti. İlk evelâ esli-başlı insanlar ve kimsesiz hasta insanlar aqqında aytıla», – dep aytıla haberde.
Qayd etilgenine köre, al-azırda şeerde şahsiy qoruv vastalarını satın almaq imkânsız oldı, ne maska, ne qolçaq, ne de paratsetamol kibi ilâclar qaldı, esli-başlı insanlar içün koronavirusnen hastalanuv telükesi arta.
Faaller, fevqulâde vaziyet olsa, evelden tizilgen cedvel boyunca böyle insanlarğa ilk ihtiyac mallarını ketirmege azır.
«Şeerniñ çeşit rayonlarında yaşağan semetdeşlerimizge muracaat etip, böyle insanlarğa bu imkân aqqında bildirmelerini rica etemiz. Mallar bedava berilmeycek, laf ilk ihtiyac mallarınıñ evge (dairege) bedava ketirilüvi aqqında kete. Taşıma tertibi ve cedveli er birinen ayrıca laf etilecek», – dep bildirdi Meclis.
Bundan evel Qırımtatar Milliy Meclisi koronavirus tarqalğanı içün uzaqtan çalışıp başladı.
Meclis reisi Refat Çubarov, ofis hadimleri, Qırımtatar Milliy Meclisiniñ azaları, Ukraina halq deputatları ve yardımcılarınıñ saife adreslerini derc etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
