Qırımtatar Milliy Meclisi, koronavirus tarqalğanı içün uzaqtan çalışıp başladı. Bu aqta Meclis reisi Refat Çubarov Facebookta bildirdi.
«Ukrainada koronavirus tarqaluv telükesi bizni, öz seviyemizde, em de müessise seviyesinde, telükeli hastalıqtan qorunmaq ve onıñ Ukrainada tarqaluvına yol bermemek içün muqayt olıp tedbir almamızğa zorlay», – dep yazdı Çubarov.
Onıñ bildirgenine köre, Qırımtatar Milliy Meclisiniñ merkeziy ofis hadimleriniñ faaliyeti aprelniñ 3-ne qadar uzaqtan yapılacaq.
«Bu müddet devamında Qırımtatar Milliy Meclisiniñ ofis hadimleri ve azaları musafirlerni uzaqtan qabul etecek», – dep aytıla haberde.
Onıñ bildirgenine köre, mesele uzaqtan al etilmese, Qırımtatar Milliy Meclisiniñ azaları ziyaretçilerni qabul etecek.
Çubarovnıñ aytqanına köre, Ukrainada koronavirus tarqaluvınıñ vaziyeti deñişse, diger qararlar qabul etile ve quvetleştirilgen tenbileyici tedbirler alına bile.
Meclis reisi ofis hadimleri, Qırımtatar Milliy Meclisiniñ azaları, Ukraina halq deputatları ve yardımcılarınıñ saife adreslerini derc etti.
Martnıñ 16-na qadar Ukrainada beş koronavirus hastası qayd etildi. Bir kişi can berdi.
Ukrainanıñ bir çoq şeerinde sıñırlav tedbirleri alındı.
