Rusiyeniñ Rostov-na-Donu SİZO-1-nde tutulğan Bağçasaraydaki dördünci «Hizb ut-Tahrir davasınıñ» mabüsi Seyran Hayredinovnıñ tuvğanları keçken ay yollağan ilâclarını tutıp aldılar. Bu aqta Ukraina ombudsmanı Lüdmila Denisova haber etti.
Onıñ qayd etkenine köre, Hayredinovnıñ ciddiy yürek problemleri bar.
«Seyran ayatı içün müim olğan ilâclarsız qala, Rostov-na-Donu SİZO-1 tahqiqat izolâtorınıñ memuriyeti olarnı resmiy şekilde tasdıqlap aldı. Tahqiqat izolâtorınıñ reberligi qanunsız areket etip, Seyran Hayredinovnıñ İnsan aqları ve esas serbestliklerini qoruv şartnamesiniñ 2-nci maddesinde ve BM İqtisadiy ve İçtimaiy şurasınıñ mabüslerge munasebet qaideleriniñ 22-nci maddesinen pekitilgen ayat, sağlıq ve tibbiy yardım aqqını bozdı», – dep aytıla haberde.
O, Rusiye zenaatdaşı Tatyana Moskalkovağa muracaat etip, Ukraina vatandaşı Hayredinovnıñ aqları ğayrıdan tiklensin dep, hususan ilâclarınıñ qaytarılması, tibbiy tedqiq keçirilmesi ve kerekli tedaviylevniñ belgilenmesi içün tedbir almasını talap etti.
Denisova, halqara toplulıqnı qırımlı Hayredinovnıñ aqları bozulğanına diqqat ayırmağa, Kreml reineleriniñ aqlarını qorçalaycaq faaliyetni devam ettirmege ve işğalci memleket olğan Rusiyege qarşı basqı quvetleştirmege çağırdı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
