Georgian Airwaves Gürcistan ava şirketi Rusiye uçaq seferlerine şimdilik devam etecegini «RİA Novosti» neşirine bildirdi.
«Yañı yasaq Rusiye ava şirketlerine ve Rusiye-Gürcistan uçaq seferlerine tesir ete, şunıñ içün bizler belgilengen cedvel boyunca uçmağa devam etemiz. Biletlerni sıñırsız almaq mümkün. Bir de bir haber olsa, bunı bildirecekmiz, amma şimdilik deñişmeler yoq», – dep aytıla beyanatta.
Ava şirketiniñ anonim menbası da TASS agentligine aynı malümat berdi.
Georgian Airwaves saytında Rusiyege ve Rusiyeden biletlerni iyülniñ 8-nden soñraki künge de almaq mümkün.
Rusiye prezidenti Vladimir Putin iyülniñ 8-nden itibaren Rusiye ava şirketlerine rusiyelilerni Rusiyeden Gürcistanğa taşımağa vaqtınca yasaq etken buyruqnı imzaladı. Turizm operatorları ve turizm agentliklerine vatandaşlarğa Gürcistan yollanmalarını satmamağa tevsiye etile.
Gürcistanda Rusiye turizm operatorlarınıñ 1500 müşterisi buluna. Olar alğan biletlerine köre qaytacaqlar, dep bildirdi Rosturizm matbuat hızmeti cumaertesi künü «İnterfaks-Turizm» Rusiye portalına.
Gürcistannıñ paytahtı Tifliste iyünniñ 20-nde başlağan narazılıq aktsiyaları devam ete. Rusiye Devlet dumasınıñ deputatı Sergey Gavrilov Tifliste keçirilgen Parlamentlerara pravoslavlıq assambleyasınıñ sessiyasını Gürcistan parlamentiniñ spikeri yerinde oturıp açqan soñ narazılıqlar başladı.
Gürcistannıñ bir çoq vatandaşı Gavrilovnıñ Tifliske kelmezden evel Abhaziya ve Cenübiy Osetiya Gürcistannıñ separatist regionlarınıñ Rusiye tarafından mustaqil devletler olaraq tanılmasınıñ lâğu etilmeycegine dair laflarına açuvlandı.
Tifliste narazılıq: polisler qalqanları ve köz yaşlatıcı gaz (süret toplamı)
İyünniñ 20-nde narazılıq aktsiyaları politsiya ile çatışmalarğa çevirildi. İyünniñ 21-nde bu adise-vaqialar sebebinden Gürcistan parlamentiniñ spikeri İrakliy Kobahidze istifağa çıqtı. Onıñ istifası miting iştirakçileriniñ talaplarından biri edi.
Narazılıq aktsiyalarınıñ iştirakçileri iç işler naziriniñ istifasını ve nevbetten tış parlament saylavlarınıñ belgilenmesini talap ete.
Tiflisniñ merkezindeki Rustaveli caddesinde keçirilgen aktsiyalar vaqtında yaralanğan 52 insan Tiflisniñ farqlı hastahanelerinde qala. Gürcistan sağlıq nazirliginiñ malümatına köre, çoqusı hastanıñ sağlıq vaziyeti stabil, bazıları bugün tibbiy müessiseden çıqacaqlar.