Rusiye prezidenti Vladimir Putin Rusiye ava şirketlerine vatandaşlarnı Rusiyeden Gürcistanğa taşımağa yasaq etti. İşbu yasaq iyülniñ 8-nden başlap çalışacaq. Buyruq imzalanğan künü işke tüşürile – iyünniñ 21-nden itibare, dep haber ete Azatlıq Radiosı.
Turistik operatorlarğa yasaq devam etkenine qadar bu memleketke yollanmaları satmamağa tevsiye etile. Yasaq «milliy telükesizlikni temin etmek maqsadınen» kirsetildi, dep haber etile. Ne qadar devam etecegi belli degil.
Gürcistan tarafı Putinniñ qararını daa izaatlamadı.
Gürcistannıñ paytahtı Tifliste iyünniñ 20-nde başlağan narazılıq aktsiyaları devam ete. Rusiye Devlet dumasınıñ deputatı Sergey Gavrilov Tifliste keçirilgen Parlamentlerara pravoslavlıq assambleyasınıñ sessiyasını Gürcistan parlamentiniñ spikeri yerinde oturıp açqan soñ narazılıqlar başladı.
Gürcistannıñ bir çoq vatandaşı Gavrilovnıñ Tifliske kelmezden evel Abhaziya ve Cenübiy Osetiya Gürcistannıñ separatist regionlarınıñ Rusiye tarafından mustaqil devletler olaraq tanılmasınıñ lâğu etilmeycegine dair laflarına açuvlandı.
İyünniñ 20-nde narazılıq aktsiyaları politsiya ile çatışmalarğa çevirildi. İyünniñ 21-nde bu adise-vaqialar sebebinden Gürcistan parlamentiniñ spikeri İrakliy Kobahidze istifağa çıqtı. Onıñ istifası miting iştirakçileriniñ talaplarından biri edi.
Narazılıq aktsiyalarınıñ iştirakçileri iç işler naziriniñ istifasını ve nevbetten tış parlament saylavlarınıñ belgilenmesini talap ete.
