Ukrayina "Cenüp" operativ komandanlığınıñ spikeri Natalâ Ğumenük Aqyarğa gece ücümini ve Sevmorzavodında eki Rusiye gemisiniñ zararlanması aqqında malümatnı izaatladı.
"Er angi bir geminiñ ğaybı müim bir ğayıptır. Çünki bir gemi müim bir cenk birimidir. Eger faiznen ifade etsek, cenkte iştirak etken Qara deñiz flotu içün bunıñ emiyetli ğayıp olğanını daa bir kere qayd etem. Olar artıq bir büyük desant gemisini, ekinci büyük desant gemisini ğayıp ettiler, bir qaç gemileri zarar kördi. Gemilerniñ ne qadar zarar körgenini şimdilik qıyın aytmaq", - dep bildirdi o.
Aynı zamanda, o, bozulğan gemiler arasında Kalibr qanatlı raketalar taşıyıcısı olmay bile, dep ayta.
Ukrayina Mudafaa nazirliginiñ Baş İstihbarat idaresi Aqyarğa gece ücümi vaqtında eki RF gemisi zarar körgeni aqqında malümatnı tasdıqladı. Bunı Hromadske Ukrayina Mudafaa nazirliginiñ Baş İstihbarat idaresiniñ temsilcisi Andriy Yusovğa atıf etip bildire.
Aqyarda Sevmorzavod gemisine gece ücümi neticesinde eki Rusiye gemisi zarar kördi, dep bildirdi. Rusiye akimiyeti angi gemilerge ücüm etilgenini bildirmey. Rusiye nezareti astında olğan Aqyar yolbaşçısı Mihail Razvojayev Ukrayina Silâlı Quvetlerini qabaatladı. Ukrayina tarafı bu vaqianı daa izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
