Aqyarda Semzavod gemisine gece ücümi neticesinde eki Rusiye gemisi zarar kördi, dep bildirdi Rusiye Mudafaa nazirligi ve şeerniñ işğal yolbaşçısı Mihail Razvojayev.
Berilgen malümatqa köre, gemi tamirlev zavodında tamir işleri devam etken gemilerge qanatlı raketlar ile ücüm etilgen. Bundan ğayrı, Rusiye reberligi bildirgeni kibi, Rusiye Qara Deñiz Flotunıñ gemiler taqımı da deñizden keçer eken deñiz dronlarınıñ ücümine oğrağan. Rusiye nezareti astında olğan Aqyar yolbaşçısı Ukrayina Silâlı Quvetlerini qabaatladı.
"Bugün gece Ukrayina Silâlı Quvetleri Aqyar şeerinde S. Orconikidze adına gemi tamirlev zavodına on qanatlı raketa ve Qara Deñiz Flotunıñ gemiler taqımı deñizden keçer eken deñiz dronları ile ücüm etti. Ava Mudafaası quvetleri yedi qanatlı raketanı urıp tüşürdi, Vasiliy Bıkov" devriye gemisi bütün ekipajsız katerlerni yoq etti. Ücüm neticesinde tamirde olğan eki gemi zarar kördi", - dep haber ete RF Mudafaa nazirligi.
Rusiye akimiyeti angi gemilerge ücüm etilgenini bildirmey. Muarririyet mustaqil menbalardan bu malümatnıñ doğrı olıp olmağanını şimdilik teşkerip olamay. Ukrayina tarafı bu vaqianı daa izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
