Geniçesk civarlarında 2 biñge qadar Rusiye arbiyi buluna, olar bütün maşinalarnı toqtatıp teşkere. Bu aqta Qırım.Aqiqatqa Geniçesk sakinleri haber etti. Şahsiy telükesizlikleri havf altında olğanı içün adlarını gizli qaldırdı.
Şaatlarnıñ aytqanına köre, Rusiye arbiyleri Geniçeskte 17-nci oquv yurtunıda lager yaptı. Geniçeskten Arabat beli çıqışında okop qazalar.
Rusiye arbiyleri 16 yaşından 60 yaşına qadar erkeklerge şeerden çıqmağa izin bermey.
Sakinlerniñ bildirgenine köre, şeerde «tınçlıq», Ukraina bayraqları tura. Geniçeskniñ merkezine Ukrainağa qoltutmaq içün qadınlar aktsiyağa çıqtı.
Al-azırda şeerde arbiy tehnika yoq. Tünevin Rusiye tehnikası yollar boyu tura edi. Haber etilgenine köre, Rusiye arbiyleri tehnikanı tarlalarda saqlay.
Qırım.Aqiqat bu malümatnı tasdıqlamaq içün başqa menbalardan haber almağa tırışa.
Fevralniñ 28-nde Geniçesk şeer şurası şeerde soqaqta bulunuv, diger cemaat yerlerinde ve naqliyat areketinde saat 20:00-dan 06:00-ğa qadar, M18 yoluna çıquv ise saat 18:00-dan 8:00-ğa qadar sıñırlana.
Hersonnıñ şeer yolbaşçısı İgor Kolıhayev martnıñ 1-nde saba şeer Kyivniñ kontroli altında buluna, dep bildirdi.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Fevralniñ 24-nde Kreml Putinniñ ücümniñ maqsadı «Ukrainanı askeriysizleştirüv ve denatsifikatsiyası» olğanına dair aytqanlarını tekrarladı.
Putin Ukrainağa ücüm etkenini aqlap, fevralniñ 21-nde Ukraina ükümeti özek silâsını almağa tırışqan neonatsist rejimi olğanına sebepsiz qabaatlavlarnı tekrarladı. Rusiye prezidentiniñ vekili Dmitriy Peskov Ukrainanıñ askeriysizleştirilüvi ne demek olğanını añlatıp, bu «çetel devletleriniñ faal ğayretleri sayesinde soñki vaqıtları pek artqan arbiy potentsialnı neytralleştirüv» ola, dep qayd etti.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net.
