General Mark Milley: Ukrayina Silâlı Quvetleriniñ Qırımnı işğalden azat etmesi "elde etilmesi pek qıyın bir maqsattır"

ABD Birleşken ştablar reisleri komitetiniñ reberi Mark Milley ve Pentagon reberi ABD Mudafaa naziri Lloyd Austin ABD Kongressinde bücet diñlemelerinde çıqışta bulundılar. Olar Rusiyeniñ tecavuzına qarşı turğan Ukrayinağa Amerika destegini daa da arttırmaq kerekkigine dair deliller ketirdiler. Ne içün ABD Ukrayinanıñ mudafaa qabiliyetini arttırmağa devam etmelidir? Ve ne içün Ukrayinanıñ strategik ğalebesi ABD ve global telükesizlik içün müimdir? Bunıñ aqqında "Amerika Sesi"niñ ukrayin hızmeti yaza.

Martnıñ 23-nde ABD Kongressiniñ Temsilciler palatasında bücet diñlemeleri vaqtında ABD Birleşken ştablar reisleri komitetiniñ reberi general Mark Milley cumhuriyetçi kongressmen Mario Diaz-Balartnıñ ABD-niñ Ukrayinağa destek strategiyası ile bağlı sualine cevap berir eken, söz bütün halqara nizamı aqqında ketkenini bildirdi.

"Strategik maqsat, 1945 senesi global mıqyasta qurulğan halqara nizamnı mudafaa etmektir. Buña, Ukrayina bütün topraqları ile beraber serbest, suveren ve mustaqil bir memleket olğanında irişedejkmiz. O zaman, bu, qaidelerge esaslanğan nizamnıñ qorçalanğanını bileceksiz", - dedi general Milley.

General Milleyniñ sözlerine köre, dünya nizamı qorçalanmasa, o zaman mudafaa bücetlerini eki qat arttırmaq kerek olacaq, çünki "o zaman bu, büyük quvetlerniñ reqabeti aqqında degil, büyük quvetlerniñ çatışması aqqında olacaq, bu da bütün dünya içün pek telükeli olacaq".

Mark Milley, Ukrayinanıñ küreşi Ukrayina içün ekzistentsial olğanını ve ABD, Avropa ve dünya telükesizligi içün temel olğan müim milliy meraqlarnı köstergenini qayd etti.

Cumhuriyetçi kongressmen Krıs Stüart Ukrayina ile bağlı strategiya Qırımnıñ azat etilmesini köz ögünde tutamı, dep soradı. General Milley, bu, Ukrayina prezidentiniñ açıq şekilde ilân etkeni maksimalist maqsattır, dep cevaplandı.

"Bu elde etilmesi pek qıyın bir maqsattır. Bizim vazifemiz Ukrayinağa özüni mudafaa etmekte yardım etmektir. ABD, Rusiye bunı böyle taqdim etmege tırışsa da, onen cenkleşmey. Biz memleketke özüni mudafaa etmege yardım etemiz", - dedi Milley.

Ukrayinanıñ özüni qorçalavına yatırımlar

ABD Mudafaa naziri Lloyd Austin bücet diñlemeleri vaqtında ABD Kongressine "yıl devamında inanılmaz destek içün" teşekkür etti ve bunıñ sayesinde Ukrayinanıñ uruş meydanında semerelikni saqlamaq içün kerek olğan silâ sistemaları ve arbiy yedekleri olğanını qayd etti.

Pentagon reberi, ABD-den kelgen yardım "ukrayinlerniñ özüni qorçalavı içün kelecekteki fırsatlarğa yatırım yapmalarına da izin bergenini" qayd etti.

Lloyd Austin millet vekillerine yapqan açılış sözünde, Vaşingtonnıñ noqta-i nazarını bir daa tekrarladı: ABD Ukrayinanı ne qadar kerek olsa o qadar desteklemege devam etecek.

Lloyd Austin, ABD Milliy mudafaa strategiyasınıñ Putinniñ idaresi astında olğan Rusiyeni "keskin telüke" kibi belgilegenini hatırlattı.

"Bidenniñ reberligi altında ABD Ukrayinağa Rusiyeniñ esassız istilâsı ile küreşüvde yardım etmek içün dünyanı birleştirdi. Bizim ortaqlarımız ve ittifaqdaşlarımız menim reberlik etkenim Ukrayina Mudafaa kontakt gruppası tarafından koordinatsiya etilgen müim telükesizlikni temin etmek içün çalışalar. Biz ne qadar kerek olsa, o qadar Ukrayinanıñ mudafaasını destekleycekmiz".

Pentagon reberi, Rusiyeniñ Ukrayinağa ücümi neticesinde peydan olğan telüke NATO-nı daa küçlü etkenini qayd etti.

"Rusiyeniñ Ukrayinağa istilâsından soñ NATO-nıñ şarqiy qanatındaki mudafaanı daa da quvetleştirdik. Kongressniñ Toqtatuv Avropa teşebbüsinde liderligi ve 2014 senesinde yatırımlarımız Rusiyeniñ saylağanı deşetli cenkke tez ve cesaretnen cevap bermekte bizge yardım etti".

Austin, kelecek yılnıñ bücetini "Qıtay Halq Cumhuriyeti ile strategik reqabetniñ ciddiyligi ile bağlı" strategik masrafname adlandırdı.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.