Aqmescitteki ekinci «Hizb ut-Tahrir davasınıñ» mabüsi Cemil Gafarovnıñ advokatı Rifat Yahin Rusiye apishane vekilleriniñ sağlıq vaziyetine dair bergen malümatını doğru dep saymay. Yahinniñ Qırım.Aqiqatqa bildirgenine köre, müvekkiliniñ saqatlığı «bir yerge ketmedi».
«Bütün bu laflarğa baqmadan, Rostov SİZOsınıñ tibbiy bölügi onı nefrolog ve kardiologğa muntazam sürette baqtırmağa tevsiye etken edi, bu mütehassıslar üzviyetiniñ tibbiy köstergiçlerini daimiy sürette taqip etmeli. Cezalarnı yerine ketirüv federal hızmeti başta bu vesiqalarnı bersin, biz olarnı mustaqil ekspertlerge berirmişç, soñra qarar alınsın: sağlıq vaziyeti yahşımı-yoqmı. Aks alda bunı delillernen isbatlanmağan cevap dep sayam. Böyle cevaplarğa baqım, Rusiyede şifahaneler artıq iç kerekmey, dep tüşünem. Er kesni birden SİZOğa yollayıq. Anda, CYKFH versiyasına köre, hasta insanlar bile yahşı ola», – dep ayttı Yahin.
Advokatnıñ aytqanına köre, Gafarov Semaşko hastahanesine tibbiy teşkerüvge çıqarıla.
«Anda kerekli tedqiqler yapıla ve SİZOğa keri qaytaralar. Maña berilgen malümatqa köre, Gafarovnıñ yanında hastahanede gece-kündüz olacaq konvoy adamları yetmey. Bu daa ne qadar sürecek ve tibbiy teşkerüv esnası ne qadar sozulacaq – belli degil», – dep qoştı Yahin.
Daa evel Cemil Gafarov yanvarniñ 28-nde tibbiy tedqiqlerge çıqarılacaq, dep haber etilgen edi.
Yanvarniñ 29-nda Qırımdaki Rusiye CYKFH idaresiniñ Qırım.Aqiqatqa bildirgenine köre, Gafarov tibbiy yardımğa muhtac degil.
Yuqarı Radanıñ insan aqları vekâletlisi Lüdmila Denisova işğal etilgen Qırımdan ukrainalı siyasiy mabüs Cemil Gafarov (Qırımdaki «Hizb ut-Tahrir davalarınıñ» mabüsi) sağlıq vaziyeti fenalaşqanını bildirgen edi. Şu sebepten Denisova Rusiye ombudsmeni Tatyana Moskalkovağa muracaat etip, Ukraina vatandaşlarınıñ tibbiy tedqiqi içün yardım etmesini rica etti.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı.
2019 senesi martnıñ 27-nde Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal tutuldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
