Ukraina prezidenti ofisiniñ reberi Andriy Yermak «Yigirmi büyük devlet» gruppası (G20) elçilerinen körüşti. Körüşüv vaqtında Ukrainada Mustaqillikniñ 30 yıllığı arfesinde «Qırım platforması»nıñ tesis sammitiniñ keçirilüvi aqqında aytıp berdi.
Bunı Ukraina prezidenti ofisiniñ matbuat hızmeti haber ete.
«O (Yermak – muar.) bu müim tedbirde Ukrainanıñ bir çoq ortağı ve dostu iştirak etecegine ümüt bildirdi», – dep yazıla bildirmede
Matbuat hızmetiniñ malümatına köre, Ukraina prezidenti ofisiniñ reber muavini İğor Jovkva, "Yigirmi büyük devlet" gruppası iştiak etmege davet etilgen «Qırım platforması» ilk-evelâ Qırım meselesiniñ halqara kün tertibine qaytarılmasınıñ aletidir dep qoştı.
«Prezident Volodımır Zelenskıy Qırımnıñ işğalden azat etilüvi, yarımadada yaşağan insanlarnıñ aqlarınıñ qoruvı ile bağlı muayyen aletler, yollar aqqında laf etmege istey. Ukraina böyle bir iş aletini taqdim etmege istey, ve biz bu aletniñ azırlanılması üzerinde gece-kündüz pek faal şekilde çalışamız», – matbuat hızmeti Jovkvanıñ aytqanlarından alıntı ketire.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
