Qırımda Rusiye quvetçileri sentâbrniñ 4-nde Aqmescitteki Rusiye FSBsiniñ idare binası ögünde tutulğan qırımlılarnıñ evlerini aylanıp çıqa.
«Qırım birdemligi» birleşmesi haber etkenine köre, Seyitler qasabasında quvetçiler mühbir Ayder Kadırovğa keldi. O, laf etmege istemedi. Kadırov «şaatlıq etmesi» içün poliske çağırıldı.
Kadırov sentâbrniñ 4-nde Qırımdaki FSB binası ögünde tutulğanlar arasında edi.
Rusiye quvetçileri qırımlılarnıñ evlerine kerçekleştirgen ziyaretleri aqqında açıq şekilde bildirmey.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Bundan ğayrı, Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Sentâbrniñ 8-nde berilgen malümatqa köre, Qırımda sentâbrniñ 4-nde Aqmescitteki FSB idaresiniñ binası ögünde tutulğan İrina Tramp Rusiye polisi bölügine çağırıldı.
