Rusiye FSBsiniñ sıñırcıları aqyarlı yaldayıcı marafoncı, sabıq dissident Oleg Sofânikniñ işğal etilgen Qırımnı terk etmesine ekinci kere izin bermedi.
Bu aqta Sofânik Qırım.Aqiqat mühbirine bildirdi.
Onıñ aytqanına köre, o, aprelniñ 27-nde saba Qırım ve Herson vilâyetiniñ memuriy sıñırındaki «Canköy» Rusiye keçiş noqtasına kelip, daa bir kere esas Ukrainağa ketmege tırıştı. Faqat Rusiye sıñırcıları «Rusiye ükümetiniñ martnıñ 27-nde alğan qararına» esaslanıp, onı yibermedi.
«Sıñırcılar meni tanıylar ve Rusiye pasportı maña Qırımdan ketmege bermey, dep ayttı. Qırımnı ne içün terk etip olamağanımnı yazma şekilde añlatmağa razı olmadılar. Rusiye vatandaşlarınıñ Rusiyeden çıqış ve kirişini sıñırlağan ükümet qararına ağzaviy şekilde esaslandılar», – dedi o.
Sofânikniñ aytqanına köre, Qırımdan ketmek içün Rusiye vatandaşlığından çıqması kerek.
O, Ukraina prezidentiniñ ofisi ve Yuqarı Radanıñ insan aqları vekâletlisi eñ yaqın vaqıtta oña işğal etilgen Qırımdan esas Ukrainağa çıqmağa yardım eterler, dep bekley. O, areket serbestligi aqqı sıñırlanğanını Avropa insan mahkemesine şikâyet etmege niyetlene, dep qayd etti.
Oleg Sofânik aprelniñ 17-nde Qırımdan esas Ukrainağa ketmege tırıştı. Amma Rusiye FSBsiniñ sıñır idaresi buña izin bermedi. Daa soñra Rusiye vatandaşlığından çıqmaq içün ariza bergenini bildirdi.
2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Ömega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.
Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi. Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.
Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.
