Aqyarlı yaldayıcı marafoncı, sabıq dissident Oleg Sofânik Qırım işğalinden soñ almağa mecbur olğan Rusiye vatandaşlığından çıquv arizasını berdi. Bu aqta o, Qırım.Aqiqat mühbirine bildirdi.
Aprelniñ 17-nde Rusiye FSBsiniñ sıñır idaresi Rusiye vatandaşlığı bar dep, onı işğal etilgen Qırımdan esas Ukrainağa yibermedi. Sofânik alğan qararınıñ sebebi bu ola, dep ayttı.
«Rusiye akimiyeti maña zorlap bergen Rusiye vatandaşı pasportım bar dep, meni Qırımdan esas Ukrainağa yibermege razı olmadı – Rusiye İç işler nazirligine muracaat etip, Rusiye vatandaşlığımnı lâğu etmege talap ettim. Pasport maña qanunsız berildi dep sayam. Bu qanunğa uymağan bir vesiqa», – dep añlattı sabıq dissident.
O, Qırımda qalmağa devam etse, «onı apishanege ya da psihiatrik hastahanege qapata bileler», dep qorqa.
Bundan ğayrı, Sofânik Ukraina prezidenti Volodımır Zelenskıynıñ ofisi ve Yuqarı Radanıñ insan aqları vekâletlisi Lüdmila Denisovanıñ apparatı oña Qırımnı terk etmege yardım eterler dep ümüt etkenini bildirdi.
2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Ömega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.
Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi. Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.
Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.
