Rusiye Federal telükesizlik hızmeti işğal etilgen Qırımda «terror teşkilâtınıñ tarafdarları» tutuldı, dep bildire.
«Rusiyede terror olaraq tanılğan teşkilâtnıñ faaliyetinde iştirak etmege azırlanğan Orta Asiyada doğma eki kişi Qırımda yaqalandı. Radikal islâm ğayelerini kütken şahıslar Suriye Arap Cumhuriyetine üçünci memleketler üzerinden barıp, halqara terror teşkilâtı saflarında silâlı zıddiyette iştirak etmege planlaştırğan edi», – dep aytıla hızmetniñ haberinde.
FSB bergen malümatqa köre, şübheliler Aqmescit – Krasnodar içün taksi sımarladı, Krasnodardan Tifliske avtobus biletlerini ve İstanbulğa uçaq biletlerini aldı.
Müessise malümatına köre, yaqalanğanlarğa qarşı Rusiye Ceza kodeksiniñ 205.5 maddesiniñ 2-nci qısmı, 30 maddesiniñ 1-inci qısmına istinaden (cinayet yapmağa azırlıq körüv – Rusiye qanunlarına köre terror olaraq tanılğan teşkilâtnıñ faaliyetinde iştirak etüv) cinaiy dava açıldı. Olar eki ayğa apiske alındı, dep bildirdi FSB.
Şübhelilerniñ ad ve soyadları qayd etilmey, olarnıñ izaatları yoq.
Martnıñ 20-nde Rusiye FSBsi, işğal etilgen Qırımda «İslâm devleti» (IŞİD) terror teşkilâtınıñ «gizli bölük» faaliyetine soñ berdi, dep bildirdi. Rusiye hızmetiniñ malümatına köre, bu teşkilâtnıñ faaliyeti Komide ve Rostov vilâyetinde de toqtatıldı.
