Rusiye FSBsi, işğal etilgen Qırımda «İslâm devleti» (IŞİD) terror teşkilâtınıñ «gizli bölük» faaliyetine soñ berdi, dep bildire. Rusiye hızmetiniñ malümatına köre, bu teşkilâtnıñ faaliyeti Kömide ve Rostov vilâyetinde de toqtatıldı.
FSB matbuat hızmeti bildirgenine köre, keçirilgen tedbirler neticesinde IŞİD içün «para toplağan ve yollağan regionlarara ağ qurğan» şahıslar yaqalandı.
«Terrorist ve tarafdarlarınıñ esaplarına hayriye olaraq tahminen eki million ruble yollanıldı. Şübheli terror teşkilâtı iştirakçileriniñ adresilerinde keçirilgen tintüvler neticesinde bağ vastaları, tölev aletleri, olarnıñ qanunsız areketlerini isbatlağan vesiqalar alındı», – dep aytıla FSB haberinde.
Müessise yaqalanğanlarnıñ sayısını aydınlatmay, ad ve soyadlarını haber etmey. Yaqalanğanlarnıñ izaatları da yoq.
2018 senesi Qırımdaki Rusiye İç işler nazirliginiñ reberligi, Qırımda «Şimaliy Kavkazda terrorizmge qarşı tedbirler keçirilgende qanunsız arbiy birleşmelerde, Suriyede IŞİD erkânında, em de Ukraina Milliy gvardiyası erkânında cenk areketlerinde iştirak etken Qırım sakinlerini tapmaq içün operativ-qıdıruv ve profilaktika tedbirleri keçirile», dep bildirdi. Müessise, «Suriye Arap Cumhuriyetine «Iraq ve Şam İslâm Devleti» halqara terror teşkilâtı erkânında cenkte iştirak etmek içün ketken» yüz Qırım sakini aqqında bildirdi.
